పీలే: బర్త్ ఆఫ్ ఎ లెజెండ్

మంచి సినిమా మంచి పుస్తకం లాంటిది. ఓ మంచి పుస్తకాన్ని చదివినప్పుడు ఎలాంటి ఫీలింగ్ కలుగుతుందో మంచి సినిమా చూసినప్పుడూ అలాంటి అనుభూతే చెందుతాం. ఈ మధ్య ఓ సివిల్స్ విజేత "తానెప్పుడూ మంచి సినిమాలు చూస్తుంటాననీ, వాటిని వివిధ కోణాల్లో విశ్లేషించడం ద్వారా వచ్చిన పరిజ్ఞానం సివిల్స్ పరీక్షల్లో ఉపయోగపడిందని" చెప్పారు. మంచి సినిమాలు ప్రతి ఒక్కరూ చూడడం చాలా మంచిదే. చరిత్రలో నిజ జీవిత విజేతల సినిమాలు అస్సలు మిస్ కాకూడదు. ఇలాంటి, మనం మిస్ కాకూడని మంచి సినిమాల జాబితాలో ముందు వరసలో ఉండదగ్గ సినిమా "పీలే: బర్త్‌ ఆఫ్‌ ఎ లెజెండ్‌". 2016లో ఇంగ్లీష్ వెర్షన్లో రిలీజైన ఈ సినిమా సూపర్ హిట్ మూవీ.            

పీలే.. అంటే ఓ క్రీడా చరిత్ర. పీలే అంటే.. కోట్ల మంది సాకర్ ప్రేమికుల ఆరాధ్య దైవం. పీలే.. అంటే పేదరికాన్ని బద్దలు కొట్టి ఫుట్ బాల్ సామ్రాజ్యాన్ని అతి చిన్న వయసులోనే ఎలిన సాకర్ చక్రవర్తి. ఇలాంటి గొప్ప ఫుట్ బాల్ క్రీడా దిగ్గజం నిజ జీవితాన్ని తెర మీద చూడటం మంచి అనుభూతిని ఇస్తుంది.1958 ప్రపంచ కప్ ఫుట్ బాల్ క్రీడల నేపథ్యంలో ఈ సినిమా ఉంటుంది. అంతకు ముందెప్పుడూ ప్రపంచ కప్ విజేతగా నిలవని బ్రెజిల్ కు "1958" గొప్ప విజయాన్ని తెచ్చి పెడుతుంది. ఈ విజయం కేవలం 17 ఏళ్ళ టీనేజర్ "పీలే"  ద్వారా దక్కిన విజయం అంటే చాలా ఆశ్చర్యంగా ఉంటుంది. పేదరికాన్ని జయించి,17 ఏళ్లకే ప్రపంచ ఫుట్ బాల్ క్రీడల్లో పాల్గొని చరిత్ర సృష్టించిన పీలే జీవితం అందరిలా సాఫీగా జరిగిపోలేదు. పేదరికం, వివక్షల మధ్య విజేతగా నిలబడడం అంత సామాన్య మైన విషయం కానే కాదు. పీలే తల్లి ఓ పనిమనిషి. తండ్రి పారిశుధ్య కార్మికుడు. ఇలాంటి నిరుపేద నేపధ్యం నుంచి కేవలం 17 ఏళ్లకే పీలే విశ్వ విజేతగా ఎలా నిలిచాడు అన్న కథే ఈ సినిమా ఇతివృత్తం. గంటా యాభై నిమిషాల ఈ సినిమాలో ఫస్ట్ హాఫ్ లో పీలే బాల్యం చాలా ఆసక్తిగా ఉంటుంది. ఇది తెరపై చూడాల్సిందే. ఇంతటి గొప్ప సినిమాను అద్భుతంగా తెరకెక్కించిన దర్శకులు జెఫ్ జింబాలిస్ట్, మైఖేల్ జింబాలిస్ట్ లకు హాట్సాఫ్ చెప్పాల్సిందే. ముఖ్యంగా ఈ సినిమాకు సంగీతం గొప్పగా ఉంటుంది. బ్రెజిల్ స్టైల్ సంగీతం వినసొంపుగా ఉంటుంది. ఇంత మంచి సంగీతాన్ని అందించింది మన ఏ ఆర్ రెహమాన్. సంగీతంలో రెండో సారి ఆస్కార్ కు నామినేట్ అయిన సినిమా "పీలే: బర్త్ ఆఫ్ ఎ లెజెండ్". Don't Miss..

  - శిఖా సునీల్