ఆస్తులు అమ్ముకుని...ఒక యోగి ప్రస్థానం ( రాబిన్ శర్మ )

" నాకు జీవితమంటే ఒక్క క్షణం వెలిగి ఆరిపోయే కొవ్వొత్తి కాదు; అది చేతికందిన కాంతులు వెదజల్లే టార్చ్ వంటిది; రాబోయే తరాలకు అందించే నాటికి దాన్ని అత్యధిక కాంతులతో వెలిగించాలని నా కోరిక."

- జార్జ్ బెర్నార్డ్ షా

ప్రపంచంలో అత్యధికంగా అమ్ముడవుతున్న పుస్తకాల జాబితాలో ' The Monk who sold his Ferrari ' ముందు వరుసలో ఉంటుంది. ప్రఖ్యాత కెనడియన్ రచయిత, వ్యక్తిత్వ వికాస నిపుణుడు రాబిన్ శర్మ ఈ పుస్తక రచయిత. The Monk who sold his Ferrari ఇప్పటికే 76 భాషల్లో అనువదించారు. భారతీయ మూలాలు ఉన్న రాబిన్ శర్మ ఇరవైఐదేళ్లకే న్యాయవాద వృత్తిని వదిలేసి రచయితగా మారాడు. The Monk who sold his Ferrari పుస్తక రచనతో రాబిన్ శర్మ ప్రపంచ ప్రఖ్యాత రచయితల జాబితాలో చేరిపోయాడు. తత్వం, తర్కం, ఆధ్యాత్మికత కలగలిపిన రచనాశైలి రాబిన్ శర్మ  ప్రత్యేకత. పాఠకుల ఆలోచనలు ప్రభావితం చేయడంలో రాబిన్ శర్మ దిట్ట. 

ఆలోచన పుట్టినప్పుడే తర్కం పుట్టింది. తర్కం పుట్టినప్పటి నుంచి " జీవితమంటే...?? " అన్న ప్రశ్నకు సమాధానాన్ని మనిషి వెతుకుతూనే ఉన్నాడు. రూసో, వోల్టేర్, కాంట్, షోపెన్ హూవర్, నీషే, బెర్ట్రాండ్ రస్సెల్, జీన్-పాల్ సార్ట్రే, జేమ్స్ అల్లెన్,  జే.కే....వంటి ఎందరో ప్రపంచ ప్రసిద్ధ ఆలోచనాపరులు జీవితాన్ని నిర్వచించారు. వారి వారి ఆలోచనలు, సిద్ధాంతాలతో జీవితం గురించి అద్భుతంగా విశ్లేషించారు. సిద్ధాంతాలు, ప్రతిపాదనలు వేరైనప్పటికీ. " సంతోషమే జీవితం " అనే మౌలిక సూత్రం అందరి సిద్ధాంతాల్లో కనిపిస్తుంది. మరి, ఎలా సంతోషంగా జీవించాలి..? డబ్బుతోనే సంతోషం ఉంటుందా..?? నచ్చిన పనిలో, నచ్చినట్లు జీవించడంలో సంతోషం ఉందా...??? ఇలాంటి కొన్ని ప్రశ్నలకు సులభంగా, అర్థమయ్యే రీతిలో రాబిన్ శర్మ రచనల్లో మనకు సమాధానాలు లభిస్తాయి. The Monk who sold his Ferrari పుస్తకం ఇప్పటికే ప్రపంచంలో కొన్ని లక్షల మంది పుస్తక ప్రియులు చదివేశారు. తెలుగులోనూ " ఆస్తులు అమ్ముకొని ఆత్మశోధనకై ఒక యోగి ప్రస్థానం " పేరుతో అందుబాటులో ఉంది.

ఈ పుస్తకంలోని కథ విషయానికి వస్తే...  అమెరికాలో పేరు గడించిన న్యాయవాది జూలియస్ మాంటెల్. అధికారం, హోదా, కావలసినంత డబ్బు జూలియస్ సొంతం. నిరంతరం తన వృత్తినే ఆలోచించే జూలియస్ కి క్షణం తీరిక ఉండదు. పని, డబ్బు తప్ప అతనికి మరో వ్యాపకానికి సమయమే ఉండదు. నిమిషాలని డాలర్లతో తూకం వేసే జూలియస్ జీవితం ఎప్పుడూ బిజీనే. యాభై మూడేళ్ల ఆ ప్రఖ్యాత న్యాయవాది ఓ రోజు కోర్టు హాల్లో కుప్పకూలి పోతాడు. గుండెపోటుతో హాస్పిటల్ బెడ్ పై ఉన్నప్పుడు జూలియస్ మనసులోఎన్నో ఆలోచనలు తిరుగుతాయి. జీవితం దాని పరమార్థం ఏమిటో తెలుసుకోవాలన్న కోరిక బలంగా కలుగుతుంది. దీంతో అత్యంత ఖరీదైన తన నివాసం, ఆస్తులు, ఎంతగానో ఇష్టపడే ఫెరారీ కారు అమ్మేసి భారతదేశం వస్తాడు. హిమాలయాల్లోని అందమైన ప్రదేశానికి ఎంతో కష్టపడి చేరుకుంటాడు. ఆ సుందర ప్రదేశంలో అక్కడ ఉండే శివన యోగుల సాంగత్యంతో జ్ఞాన బోధ కలుగుతుంది.శివన యోగులతో కొంతకాలం జీవించిన తరవాత మానసికంగా, శారీరకంగా జూలియస్ పూర్తిగా మారిపోతాడు. ఈ విషయాన్ని తన అసిస్టెంట్  జాన్ కి చెప్పేందుకు తిరిగి అమెరికా వస్తాడు. ఓ రోజు సాయంత్రం జూలియస్ ని చూసిన జాన్ తనకళ్ళని తనే నమ్మలేక పోతాడు. ఆ సాయంత్రం జూలియస్ తన అనుభవాలను జాన్ తో పంచుకోవడమే ఈ పుస్తక సారాంశం. వారి మధ్య జరిగిన సంభాషణ చదివే పాఠకులను ఉత్తేజ పరుస్తుంది. 

ఈ పుస్తకంలో జీవితానికి ఉపయోగపడే ఏడు జ్ఞాన సూత్రాలను రాబిన్ శర్మ చెబుతాడు.1. నీ మనసును నియంత్రించు 2. నీ లక్ష్యాన్ని అనుసరించు 3. కైజెన్ అభ్యసించు 4. క్రమశిక్షణతో జీవించు 5. కాలాన్ని గౌరవించు 6. నిస్వార్థ సేవ చెయ్యి 7. ప్రస్తుతాన్ని ప్రేమించు. ఈ ఏడు అంశాల గురించి జూలియస్, జాన్ మధ్య జరిగే సంభాషణ చదువు తున్న పాఠకులకు మరింత ఆసక్తి కలిగిస్తుంది.

1. సుఖంగా జీవించడానికి, ఆనందంగా జీవించడానికి చాలా తేడా ఉంది.

2. జీవితంలో పెద్ద పెద్ద ఆనందాల వెంట పరిగెత్తటం మానేస్తే.. చిన్న చిన్న ఆనందాల విలువ తెలుస్తుంది.

3. ప్రతి సంఘటనకూ ఒక ప్రయోజనం ఉంటుంది. ప్రతి విఘాతంలోనూ ఒక గుణపాఠం ఉంటుంది. వైఫల్యం అన్నది మన వ్యక్తిత్వ విస్మృతికి అత్యవసరం. అది అంతరంగిక ఎదుగుదలకు, మానసిక వికాసానికి దోహదం చేస్తుంది.

4. నీ పై నీకు శ్రద్ధ లేకపోతే ఇతరులకు నువ్వేం చేయగలవు ? నీకు నువ్వు మేలు చేసుకోక పోతే ఇంకొకరికి ఎలా మేలు చేయగలవు ? నన్ను నేను ప్రేమించుకోకపోతే నిన్ను మాత్రం ఎలా ప్రేమిస్తాను ?

5. నీ ప్రతి ఆలోచనపై నీకు బాధ్యత ఉండటమే గొప్పదనానికి నువ్వు చెల్లించే మూల్యం.

6. ఇతరులను అధ్యయనం చేసే వారు వివేకులు. కానీ, తమని తాము అధ్యయనం చేసుకునేవారు జ్ఞానులు.

7. భయమనేది మానసిక నియంత్రణకు సంబంధించిన స్పందన. నువ్వు జాగ్రత్తగా ఉండకపోతే అది నీ శక్తినీ, సృజనాత్మకతనూ, ప్రేరణ శక్తిని  కూడా పీల్చేస్తుంది.

.... ఇలా మన ఆలోచనలను సైతం మార్చివేసే ఈ పుస్తకం ప్రతి ఒక్కరి చేతిలో ఉండాల్సిందే.

- శిఖా సునీల్