మనిషి ఎలా ఆలోచిస్తే అలా..

 " మానవుడు సాధించేది మరియు సాధించలేనిది ప్రత్యక్షంగా అతని ఆలోచనల ఫలితమే " 

- జేమ్స్ అల్లెన్ 

ప్రఖ్యాత తత్వవేత్త జేమ్స్ అల్లెన్ రాసిన 'As a Man Thinketh ' పుస్తకం 1902లో ప్రచురితమైంది. జేమ్స్ అల్లెన్ చనిపోవడానికి సరిగ్గా పది సంవత్సరాల ముందు ఈ పుస్తకం ప్రపంచం ముందుకు వచ్చింది. అప్పటికే జేమ్స్ అల్లెన్ ప్రఖ్యాత తత్వవేత్తగా, వ్యక్తిత్వాన్ని ప్రభావితం చేసే గొప్ప రచయితగా పేరు పొందాడు. ఇప్పటి వ్యక్తిత్వ వికాస రచయితలకు జేమ్స్ అల్లెన్ ఆద్యుడు. ఆయన ఆలోచనల సారాన్ని మొత్తం As a Man Thinketh లో పొందుపరిచాడు. కోట్ల మంది పాఠకులను ప్రభావితం చేసిన ఈ చిన్న పుస్తకం ప్రపంచంలోని అన్ని భాషల్లోకి అనువదింపబడింది. తెలుగులో కూడా ' మనిషి ఎలా ఆలోచిస్తే అలా..' అన్న పేరుతో అందుబాటులో ఉంది. ఈ పుస్తకం కేవలం 39 పేజీల చిన్న పుస్తకం. ఇందులో 7 వ్యాసాలు మాత్రమే ఉంటాయి. ఒక్కో వ్యాసం ఐదు పేజీలకు మించి ఉండదు. మనసుపెట్టి చదివితే గంటలోపే ఈ విలువైన పుస్తకాన్ని ఆసాంతం చదివేయవచ్చు. కానీ, ఒక మనిషి జీవితానికి సరిపడా వ్యక్తిత్వ పాఠాలు ఇందులో కనిపిస్తాయి. ఇది ఒక్క సారి చదివి వదిలేసే పుస్తకం కాదు. మళ్ళీ మళ్ళీ చదువుతూ మన లైబ్రరీలో ఎప్పటికీ ఉండాల్సిన పుస్తకం. ఈ పుస్తకంలో కనిపించే ప్రతి పదం నేరుగా మన మనసులో నాటుకు పోతుంది. జేమ్స్ అల్లెన్ తరువాత ఎందరో వ్యక్తిత్వ వికాస రచయితలు ప్రభావవంతమైన రచనలు, పుస్తకాలు రాసినప్పటికీ వాటి మూలం As a Man Thinketh పుస్తకంలో కనిపిస్తుంది.

1. మానవునికి ఆశించడం వలన, ప్రార్ధన వలన ఏది లభించదు. అతడు ఏదైనా న్యాయబద్ధంగానే సంపాదించుకోగలడు. అతని కోరికలు, ఆశలు ఫలించేది కేవలం అతని ఆలోచనలు వాటికి తగ్గట్టుగా ఉన్నప్పుడే.

2. అతి గొప్ప విజయం ఒకప్పుడు మొదట కొంత కాలం కేవలం ఒక కలే.

3. మంచి ఆలోచనల వలన చెడు జరగదనీ, చెడ్డ ఆలోచనల వలన మంచి జరగదనీ ఇది అత్యంత ఖచ్చితమైన న్యాయమైన సత్యం అని తెలుసుకోవాలి.

4. లక్ష్యం లేని ఆలోచన ఒక దుర్గుణం.

5. ఒక వ్యక్తి తన పరిస్థితులను నేరుగా తనకు కావలసిన విధంగా ఎంచుకోలేడు. కానీ, తన ఆలోచనను మాత్రం తన ఇష్టం వచ్చినట్లు ఎన్నుకొని వాటి ద్వారా తన పరిస్థితులను ఖచ్చితంగా రూపొందించుకోగలడు.

6. శరీరం మనసు అడిగే ప్రతి పనిని విధేయతతో చేస్తుంది.

7. బాధ ఎప్పుడూ ఒక చెడ్డ ఆలోచనా ఫలితమే.

8. అనుమానం, భయం ఎప్పుడు ఏది సాధించింది లేదు. ఎప్పుడు సాధించలేవు కూడా. అవి ఎప్పుడు ఓటమికి దారి తీస్తాయి. అవి చేరిన వెంటనే లక్ష్యం, బలం, శక్తి, సంకల్పశక్తి అన్ని పనిచేయడం ఆగిపోతాయి.

9. ఈ ప్రపంచాన్ని రక్షించేది భవిష్యత్తు గురించి కలలు కనే వారే.

10. మీ ఊహలను ప్రేమించండి, మీ ఆదర్శాలను ప్రేమించండి, మీ హృదయాన్ని కదిలించే సంగీతాన్ని, మీ మదిలో మెదిలే అందమైన దృశ్యాలను, నిర్మలమైన మీ ఆలోచనలను సుందరంగా అలంకరించే ఊహలను ప్రేమించండి. ఎందుకంటే వాటి నుండే సంతోషకరమైన అన్ని పరిస్థితులూ, స్వర్గతుల్యమైన వాతావరణం ఏర్పడతాయి. మీరు వీటిపట్ల నిజాయితీగా ఉంటే చివరకు మీ ప్రపంచం నిర్మించబడుతుంది.

As a Man Thinketh లో కనిపించే ఇలాంటి జెమ్స్ అల్లెన్ మాటలు మన మనసుపై చెరగని ముద్ర వేస్తాయి. చిన్నా పెద్దా అన్న తేడా లేకుండా ప్రతి ఒక్కరి చేతిలో ఉండాల్సిన గొప్ప పుస్తకం ఇది.

- శిఖా సునీల్